طالما ان الفالنتين عدى و محدش جاب سيرتة هنا و لا حاجة - عن نفسي كنت متوقع غير كدة - فدة خلاني افتكر يوم من ايام 14 فبراير و انا في الكلية - و محدش يسألني اية العلاقة ولا اية اللي فكرني أساسا - عموما ... كان يوم 14 فبراير2001 و داخل الكلية و عادي يعني شايل البوكية الاحمر و مستحمي و حاطط جل - أن ليفين و الله - و لابس الحتة اللي ع الحبل ... طبيعي لحد كدة دخلت الكلية و الاقي الدنيا عادي جدا ... لا حد لابس أحمر .. مفيش حد معاة ورد ... مفيش حد متبرفن أوفر شوية ... يوم عادي يعني من أيام الكلية ... طيب ... انا جيت متأخر يمكن و لا حاجة ( أقنعت نفسي بكدة ) الادهى من كدة بقى ... اني بقيت محط أنظار الشباب و البنات اللي حواليا ... طب انا فيا حاجة مش مضبوطة لا قدر الله ؟ بقيت أكلم نفسي ... طب اني اشوف حد أعرفة ؟؟ المهم قلت امشي اروح اشوف فين الناس بتوعي ... اضرب بطرف عيني كدة يمين ولا شمال ... اية دة اية الاحمرار اللي جاي من الناحية اللي هناك دي ؟؟؟ مش فاهم ... اما نشوف اية دة
اها ... دي تجارة انجليش ... طب مش انا لوحدي بقى اللي شايل ورد ... اية دة ؟ اشمعنى دول ؟؟ معقول تكون البشرية دي كلها- بتاعت عربي - مش عارفة ان النهاردة الفالانتين و الذي منة ؟ منطقي ؟؟ .... المهم ان دة اللي فعلا حصل ... مفيش حد في دماغة الموضوع من أصلة - مش عشان هما مثلا مش بيحتفلوا بالكلام دة - لأ .. عشان محدش يعرف .. بدون مبالغة كنت انا و بتوع انجليش اللي عاملين في نفسنا كدة .... طب و اليوم هيتقضى كدة و لا اية ؟؟؟ المهم ان اليوم عدى .. و لما حكيت للبنت اللي هديلها الورد .. قالتلي ... دة طبيعي ... الي يخليك متعرفش ان في يوم حب يوم 4 نوفمبر و تستغرب اوي ان الكلية كلها حمرا ... يخلي الناس دي كلها مستغرباك و انت داخل النهاردة بالورد يا فالانتينو .... !!! بتعملوا اية بقى في اليوم المبهج دة ؟؟ اللي بيحتفل بيعمل اية ؟ واللي مش بيحتفل مش بيحتفل لية ؟ طب انتوا مقتنعين ان الحب لازم يكون لة يوم واحد في السنة ؟؟
هناك 10 تعليقات:
اسكت ده كان ييووم
انا رجعت زي القتيل علي 11 بالليل بعد يوم مجهد من الشغل مافتكرتش الا لما فتحت التي في
قال فالنتين قال
ياعم فكك
ولا عملت حاجة :D
عادي يوم زي أي يوم في السنة :) .. الصراحة أنا نزلت الجامعة في AUC وطبعـًا مالقيتش أي مظهر من مظاهر الاحتفال باليوم المبهج ده :D .. ناس واقعية وعملية أووووي :D .. واليوم عدى عادي جدًا :)
وبصراحة أنا مش بؤمن بالحاجات دي خالص :)
كان اليوم دا أجازة عندى من الشغل .. و يوم السبت دايما بروح مع صحابى نقعد فى كوستا الصبح اللى فى كارفور .. روحت انا و أسلام صاحبى و بعد شويه هلت بشاير الفالانتين فى المكان .. احنا كنا هناك من الساعة 11 بعد الساعة 2 بدؤا يهلوا :D
و أحنا قاعدين ولا اى حوار .. لغاية ما جاه واحد صاحبنا راح أشترى هدية لمراته و شلنا الهدية :D
نسيت أقول ان اليوم دا دقنى كانت طويلة و كنت مكسل احلقها :D
ههههههههههههههه
انا احتفلت نص احتفال
بس كان عندي امتحان ومطحونة بزاكر :D فالتين رهيب بصراحة مع الامتحنات
كان يوم كوميدى جدا جدا جدا بجد
من عشرة الصبح لتسعة بالليل فى الشارع
ابتدى بمشوارين من اللى بيحسسوك انك بنى ادم له لزمة فى الدنيا
و نصه التانى كان مع فنون و ده كان اكتر جزء كوميدى فى اليوم بصراحة خلوها هى تقولكم ليه بقى :D
و فى النص كان فى فاصل من كلبشة العربية و مباحثات مع ظباط مرتشين و بعدين نسيت مفتاح العربية جوه العربية كالعادة و قفلت عليه..يوم كوميدى كوميدى يعنى..قال فالنتين قال :D
انا مدخلتش مدونة الا ولقيتها بتشتم فى الفلانتين ده
طيب لما كلوا بيكره الفلانتين كده
مين اللى بيحتفل بيه
ولا ايه يا رجاله :))
لا لا لا
على العموم انا بقى عكسكم
احتفلت أعلى احتفال
وشوارع دبى تشهد
اسألوها حارة حارة ، وشارع شارع
يشهد على اللى عملته
يلا كفاية كده عليكو
ههههه
السلام عليكم
ازيك يا دكتور
تحياتى
الفلانتايم ده ما بحبوش
عشان السنه كلها المفروض بتقى فلانتايم
مش ضرورى 14 فبراير
خلى ايامك كلها فالانتايم
تحياتى
يوم زي اي يوم
مفيش اي مظهر من مظاهر الفالانتاين موجودة حواليا
ولا حد حتى قاللي هابي فالانتاين :D
فالانتاين اية بس
على فكرة كل الناس السينجل حابين اليوم دة عشان مايحتفلوش بيه .. اقله وفروا تمن هدية ب 500 جنيه على الاقل لحبايبهم :D
مابقتنعش بيه الحقيقة .. يعني مانعرفش نقول كلمتين الحب دول الا يوم 14 ؟؟ ماعندنا السنة كلها نقول في اي يوم من ايام ربنا الي احنا عاوزينه :D
انا لسة مستني حد يقوللي عمل اية
ولا اللمة كلها سنجل ؟؟؟
ايه ياعم عمر
استهدى كده بالله يا حج :))
السلام عليكم
إرسال تعليق