شوية اسلاك..و كيبورد

ده كان تصورى فى الاول عن العالم الغريب العجيب اللى احنا فيه ده
تخيلت ان كل اللى هيجمعنى بناسه شوية اسلاك..
نكتب مواضيع..نرغى عن حاجة مضايقانا..نتناقش..نختلف..
نتخانق.. يمكن نتصالح و يمكن لأ..و خلاص
عمرى ما فهمت ازاى واحد عاقل ممكن يكون صداقات باللاسلكى
ازاى ممكن يحول علاقة بشوية اسلاك لعلاقة حقيقية بين بنى ادمين حقيقيين؟
تابعته من بعيد لمدة مش قليلة ابدا..
الاول كنت منبهرة بالفكرة..
بعدين اتخضيت ان فى ناس العالم ده بيمثلها
اكتر من مجرد علاقات سطحية باشخاص غير واقعيين
ناس حولت الهدف من العالم ده من مجرد مناقشات باردة..جامدة..
مافيهاش اى نوع من انواع الاحاسيس البشرية
لعالم حقيقى بين بنى ادمين علاقتهم ببعض اكبر بكتير من الصداقة

بصراحة مجرد الفكرة دى كانت بترعبنى فى الاول..و بتضحكنى احيانا
كنت ببقى عايزة اقولهم فوقوا..
ده الواحد فى الواقع و هو شايف اللى قدامه وجها لوجه بيتصدم فى الناس
ما بالك بعالم مفتوح..اى حد ممكن يدخله..
فرص الكذب و الادعاء و النفاق مش قليلة ابدا
ازاى بتعملوا كده؟
مخى يقولى انتى محبكاها شوية..و انا اقول ابدااا هم اللى بيهرجوا
بعدين خدت القرار العظيم بانى انضم للعالم ده..
و فى دماغى انه استحالة يزيد عن علاقات سطحية
بناس معرفش عنهم غير اسماء مستعارة و صور مش بتاعتهم
تخيلت انى بالكتير شهرين و همشى..تجربة جديدة بالنسبالى و هتخلص
بعد ما قربت اكتر من العالم ده..

اكتشفت انى كنت سطحية جدا فى حكمى عليه
لقيت ناس من ارقى ما يكون..ناس نضيفة بجد..

عقولها محترمة و تفكيرها محترم
لقيت ان علاقتى السطحية بكتير منهم
اتحولت مش عارفة ازاى لعلاقة صداقة و يمكن اخوة كمان
كنت بسأل الاول ازاى ممكن اقرب منى ناس عمرى ما شفتهم ولا شافونى
ازاى ممكن اسمع صوتهم فى التليفون
و ناخد و ندى و احنا عمرنا ما عرفنا بعض عن قرب
اكتشفت ان دى اسألة من اتفه ما يكون..
و اجابتها هى نفسها الاسئلة اللى كانت فى دماغى من الاول
اذا كان الواحد بيتخدع فى ناس يعرفهم..
يبقى المعرفة دى مش سبب كافى ابدا يضمن ان الناس دى تستاهل الثقة..
لقيتنى بتغيربجد..ابتديت اندمج فى العالم ده..من علاقة سطحية..
لشوية كلام عابر..لصداقات و ثقة حقيقية..
مع انى فى العادى صعب جدا ادى ثقتى لحد
اتعلمت كتير..كتير اوى بجد
اتعلمت من فنون

ان الواحد ممكن يكون له "قرين" فى الدنيا و هو مش عارف :)
اتعلمت من ايمان

ان فى ناس لسه طيبة فى الدنيا..كلامها من قلبها..
التلقائية و العفوية صفات حقيقية فيها من غير تزييف ولا لف و دوران
اتعلمت من كبارى

البساطة و الدبلوماسية فى المناقشة..
ازاى ممكن الواحد يقول اللى هو عايزه من غير ما يجرح اللى قدامه..
و حتى لو خسر نقطة فى المناقشة فالاكيد انه بيكسب احترامه
اتعلمت من نورهان

ان فى كيميا ممكن تحصل بين اتنين بنى ادمين عمرهم ما شافوا بعض..
لكن احساس غريب بالالفة بيحصل بينهم من غير عقد ولا ترتيبات
اتعلمت من سندريلا و الشاردة

ان فى بنات جدعة لسه موجودة فى الدنيا
بنات قوية بعقليات مستقلة..
بعيدة عن التفاهة و السطحية

و التدوير على عريس قبل ما القطر يفوت :)
اتعلمت من ماجا..

ازاى الواحد ممكن يفهم دينه صح اوى
و يجمع بين التدين ده و التحضر و الثقافة..
اتعلمت من لكتر

العمق فى التفكير..
و بعد النظر و ازاى الواحد يشوف اللى ورا اللى قدامه
اتعلمت من مصعب..

ازاى الواحد يكون دوغرى..
يقول اللى هو شايفه صح من غير تزويق ولا تلوين
اتعلمت منكم كتير و لسه بتعلم..
و كتير منكم لسه ما عرفتهمش و اتمنى فى يوم اعرفهم اكتر..
يمكن نتقابل فى يوم و يمكن لأ..

لكن الاكيد ان اللى بيجمعنا اكتر من شوية اسلاك و كيبورد