فضفضـــه ,,

لمّا تكلم بعض الأخوه فى المدونه عن علاقته بالآخرين , وعما اكتسبه منهم وتأثر به من مخالطته اياهم ,,

وجدت لزاما علينا أن أتحدث ولو بالقليل عما أشعــر به ,,

وبعيدا عن الفصحى التى تزيّن كلماتى ,,

انا بحبكم اوى على فكره (( ابتسامه ))

بحبكم ونفسى ربنا يكرمكم كلكم , ويحققلكم اللى بتتمنوا من الحياة ,,

نفسى ربنا يكرم قبارى ويوفقه فى حياته , ويحققله الحياة والمستوى الاجتماعى اللى بيسعى ليه وبيتمناه ,,

وهيوصل ان شاء الله للى عاوزه ,,

احلم يا كبارى ,,

احلم , محدش يقدر يحرمك من الحلم ,,

ونفسى ربنا يكرم ماجا ويباركله فى حياته , ومتخافش يا حبيبى , هتبقى سعيد فى حياتك , انا واثق فى الله انه هيوفقك

وربنا أكرم بعبيده من أى حد , لو الدنيا كلها كانت ضدك , متخافش ربنا معاك بجد ان شاء الله

وعلى فكره انا واثق ان شاء الله من أنك من أبعدنا عن اليأس والقنــوط

وربنا هيرزقك بالزوجه الصالحه ان شاء الله اللى تسعد بيك وتسعد بيها , لأنى بصراحه شايفك اتأخرت وعاوز أفرح بيك (( ابتسامه ))

أما عن دكتور محمد ,,

فانا نفسى ربنا يوفقه فى حياته ومستقبله ويرزقه بالصحه والعافيه والاخلاص والرزق الوفير ان شاء الله ,,

ربنا هايحققلك كل اللى بتتمناه يا محمد والله , طالما انت بتتقى الله ومع ربنا فى كل كبيره وصغيره هايكرمك ويوفقك يا حبيب قلبى ,,

شد حيلك انت بس يا دكتور , وبعدين ده انت دكتور يا دكتور , وربنا هيرزقك بالعيون الخمسه بتوع الدكاتره ان شاء الله (( ابتسامه ))

عارفهم ولا اقلهملك ..؟!

ويا أختى الطيبه ايمان سما مصر ,,

نفسى بس يا اختى تثقى فى نفسك اكتر , انتى عارفه ...

انتى اكتر واحده فينا ربنا هايكرمها فى حياتها , وهاتشوفى ,,

لأن ربنا ابدا لا يظلم العبــاد , وانتى من أبعد خلق الله عن السوء والحقد والغل وامراض القلــوب ,,

بس انا نفسى بجد ربنا يرزقك بالزوج الصالح اللى يقدر الكنز اللى هايكون معاه , ويعرف يوظف طيبتك وحنيتك دى لصالحك ,,

ربنا يكرمك يا أختى يارب

ويا أخت فنون ,,

مش عارف اقول ايه بصراحه ,,

بس صدقينى القدر ده من عند ربنا الحكيــم العليــم , ولا يمكن ربنا يقدر شئ هباء وبدون حكمــه

لا , حاشا لله ..

قال تعالى (( إنا كل شئ خلقناه بقدر )) , فمتخافيش من المستقبل ,,

ومتخافيش من القدر , اكيد اللى جى أحلــى ,,

وانا واثق ,,

وربنا يحققلك كل اللى بتتمنيه , وييسرلك الأمر انك تخدمى الاسلام والمسلمين ,,

وعلى فكره انتى حنينه اوى

وأما الأخت بنت مصريه ,,

انتى طيبه على فكره يا أختى ,,

وضعيفه اوى عن اللى ظاهر صدقينى ,,

والضعف ده حلو على فكره مش وحش ,,

بس اهم حاجه تخلى بالك من نفسك اوى ,,

وتشوفى انتى عاوزه تعملى ايه لدينك اللى عاوزه تخدميه , وبعد كده اعملى كويس للهدف ده

وانا نفسى تكتبى وتدافعى عن الاسلام بالكتابه لانك بتكتبى كويس اوى ,,

وفى رأيى أحسن واحده بتعرف تكتب فينا وتعبر عن نفسها هو انتى , خاصة فى التعليق على المواقف بكلمات قليله ,,

على فكره انتى هشّـه اوى ,,

وأما بقى عن أختى الرومانسيه الرقيقه سندريلا ,,

فمتخافيش من اللى جى , وانا واثق فى ربنا انه هايحققلك اللى عاوزه ,,

لأن انتى مخلصه اوى وبحس فيكى السكون والهدوء بطريقه غريبه ,,

أهم حاجه تعلمى اولادك السكون والهدوء اللى فيكى , ونفسى ربنا يرزقك بانسان صاحب حس عالى وراقى يعرف يوازن السكون والهدوء اللى فيكى ,,

هاتبقى حياتكم ممتعه اوى ان شاء الله (( ابتسامه ))

أما عن أختى الشارده ,,

متخافيش مشروعنا على المنتدى الاسلامى اكيد هايفشل (( ابتسامه ))

لا طبعا , انا بهزر معاكى ,,

انتى بقى يا اختى باين عليكى الثبات والقوه فى نظرى ,,

بس بقدر ما هو ده باين عليكى جواكى العكس , جواكى ضعف وشجون , جواكى حب للحياه , جواكى حب للدين ومحاولة خدمته

ربنا هايكرمك ان شاء الله

وهايوفقك فى حياتك , واتمنى من ربنا انه يرزقك بزوج تكملوا مع بعض المسيره ويساعدك على اللى عاوزه تعمليه من الخير

وكمان أخى ريلف

ابتسم للحياه يا أخى

ابتسم ومتخافش , ربنا هايكرمك وهايوفقك لانك انسان طيب وحنين

خليك واثق فى ربنا (( ابتسامه ))

.....................

معلش انا كترت الكلام عليــكم ,,

وكمان اول مرة أتكلم عن الأخوات , فاعذرونى لو تجاوزت قليلا , فأنا آســف

بس تقدروا تعتبروا دى فضفضه من القلب ,,

وبالله عليكم تدعولى كلكم كتير ,, انا تعبان شويه , وداخل على مرحله فى حياتى صعبه شويه

انا تعبت اوى وانا بكتبلكم الموضوع ده

تعبت بجد , وحاسس انى خايف

ممكن ابعد عنكم بعد فتره مش كتيره

اتمنى تفتكرونى بالخيـــر

وتدعولى

ربنا يخليكو ليا يارب

السلام عليكم